काठमाडौँ । केपी शर्मा ओली र रमेश लेखक पक्राउ परेपछि देशको राजनीतिक वातावरण थप तातिएको छ। यसैबीच, श्रम संस्कृति पार्टीका अध्यक्ष हर्क साम्पाङ ले यस घटनालाई “प्रतिशोधको राजनीति” को रूपमा व्याख्या गरेका छन्।
सामाजिक सञ्जालमार्फत प्रतिक्रिया दिँदै साम्पाङले आफूले पहिल्यै यस्तो अवस्थाको संकेत गरेको दाबी गरेका छन्। उनले ओखलढुङ्गामा भएको एक कार्यक्रम स्मरण गर्दै भनेका छन्—जसले सत्ता सम्हाले पनि देशमा प्रतिशोधकै राजनीति हाबी हुने, जबकि वास्तविक प्रगतिको एजेन्डा आफ्नो पार्टीसँग मात्र रहेको उनको दाबी छ।
उनको भनाइमा अबको राजनीतिक दिशा आन्दोलन, असन्तुष्टि र टकरावतर्फ जाने संकेत देखिएको छ। “अब हुने भनेको आन्दोलन नै आन्दोलन हो,” उनले टिप्पणी गरेका छन्।
साम्पाङले यति मात्र नभई विगतका आन्दोलनका क्रममा भएका हिंसात्मक गतिविधितर्फ पनि ध्यानाकर्षण गराएका छन्। उनले सिंहदरबार, संसद् भवन, सर्वोच्च अदालत लगायतका राज्यका महत्वपूर्ण संरचनामा भएको तोडफोड र आगजनीलाई स्मरण गर्दै त्यस्ता घटनामा संलग्न व्यक्तिहरूलाई पनि कानुनी दायरामा ल्याउनुपर्ने माग गरेका छन्।
“राज्यको सम्पत्ति जलाउने र भत्काउनेहरूलाई पनि उस्तै कारबाही हुनुपर्छ,” भन्दै उनले सबैलाई समान रूपमा कानुन लागू गर्नुपर्ने धारणा राखेका छन्।
यस टिप्पणीसँगै साम्पाङले वर्तमान राजनीतिक प्रवृत्तिमाथि प्रश्न उठाउँदै, न्याय र उत्तरदायित्वको सन्तुलन कायम गर्न राज्य गम्भीर हुनुपर्ने संकेत दिएका छन्।
