सत्यनारायण शर्मा
विराटनगर । सशस्त्र प्रहरी बल नेपाल नम्बर ३ गण कंकालिनी, मोरङले असोज महिनामा सीमा क्षेत्रमा तस्करी नियन्त्रण तथा लागुऔषधविरुद्धको अभियानलाई तीव्र बनाउँदै १ करोड ६४ लाख २९ हजार ७३३ रुपैयाँ मूल्य बराबरका विभिन्न सामान बरामद गरेको छ ।
गणले सार्वजनिक गरेको असोज महिनाको बरामदी विवरणअनुसार तस्करी गरी ल्याइएका विभिन्न वस्तु तथा सामान नियन्त्रणमा लिई आवश्यक कारबाहीका लागि विराटनगर भन्सार कार्यालयमा बुझाइएको छ । यस अवधिमा लागुऔषधसमेत बरामद गरिएको छ भने अवैध कारोबारमा संलग्न रहेको आशंकामा ६ जनालाई पक्राउ गरिएको विवरणमा उल्लेख छ ।
सशस्त्र प्रहरीले असोज महिनामा सबैभन्दा बढी मूल्यका सवारीसाधन बरामद गरेको छ । बरामद सवारीसाधनको मूल्य ७८ लाख ७५ हजार रुपैयाँ रहेको छ । त्यसैगरी ३८ लाख ५४ हजार ८८० रुपैयाँ मूल्यका लत्ताकपडा, १६ लाख ४४ हजार ६०० रुपैयाँका अन्य सामान तथा १० लाख ६० हजार ७१० रुपैयाँका किराना सामान बरामद गरिएको विवरणमा उल्लेख छ ।
त्यस्तै, ५ लाख ७२ हजार ७ रुपैयाँका शृङ्गार तथा कस्मेटिक सामान, ४ लाख ५२ हजार १०० रुपैयाँका औषधि तथा मेडिकल सामग्री, २ लाख २९ हजार ६९० रुपैयाँका हार्डवेयर सामान र १ लाख ९३ हजार ३०० रुपैयाँका फलफूलसमेत बरामद गरिएको छ ।
यसैगरी मोबाइल तथा पार्टपुर्जा, चस्मा, रजनीगन्धा तथा गुट्खा, इलेक्ट्रोनिक्स सामानलगायतका वस्तु पनि नियन्त्रणमा लिइएको छ । बरामद सामानमध्ये केही वस्तु नष्ट गरिएको विवरणमा उल्लेख भए पनि नष्ट गरिएका सामानको छुट्टै विवरण स्पष्ट छैन ।
