विराटनगर, मंसिर १९।
मोरङ मुस्लिम समुदायले पूर्व प्रधानन्यायाधीश सुषिला कार्कीले हालै सार्वजनिक रूपमा व्यक्त गरेको भनाइले मुस्लिम समुदायको धार्मिक आस्था र सामाजिक सम्मानमा आघात पुगेको भन्दै प्रेस सम्मेलनमार्फत औपचारिक प्रतिवाद गरेको छ। पत्रकार महासंघ विराटनगरमा आयोजित कार्यक्रममा समुदायले उक्त टिप्पणी तत्काल फिर्ता लिन माग गरेको हो।
समुदायका प्रतिनिधिहरूले कार्कीले व्यक्त गरेको अभिव्यक्तिले मुस्लिम समुदायप्रति नकारात्मक छवि निर्माण गर्ने प्रयास भएको तथा यसले सामाजिक सद्भाव खल्बलिने आशंका बढाएको बताए। उनीहरूले भने, “नेपाल बहुजातीय, बहुधर्मी र समावेशी समाज हो। यस्ता संवेदनशील विषयमा व्यक्त गरिने धारणा जिम्मेवार, तथ्यपरक र समुदायको सम्मान हुने खालको हुनुपर्छ।”
समुदायका मागहरू
पत्रकार सम्मेलनमार्फत मुस्लिम समुदायले निम्न तीन माग औपचारिक रूपमा अघि सारेका छन्—
-
मुस्लिम समुदायलाई लक्षित गरी व्यक्त गरिएको टिप्पणी फिर्ता लिनु।
-
उक्त अभिव्यक्तिबारे स्पष्ट स्पष्टीकरण सार्वजनिक गर्ने।
-
भविष्यमा संवेदनशील विषयमा अभिव्यक्ति दिने क्रममा जिम्मेवारी र संयमता अपनाउन आग्रह गर्ने।
समुदायको भनाइ: ‘हामी शान्ति, सद्भाव र संवादका पक्षमा’
समुदायका प्रतिनिधिहरूले आफूहरू नेपालका शान्तिप्रिय, श्रमशील तथा राष्ट्रप्रेमी नागरिक भएको पुनः स्मरण गराउँदै धार्मिक स्वतन्त्रता, सामाजिक सम्मान र सामुदायिक सद्भाव सबैको साझा जिम्मेवारी भएको बताए।
उनले भने, “हाम्रो उद्देश्य कसैलाई आक्रमण गर्नु होइन। सामाजिक सद्भाव, सकारात्मक संवाद र समुदायको पहिचान सुरक्षित राख्ने सभ्य लोकतान्त्रिक अभिव्यक्ति मात्र हो।”
सरकार र मिडियाप्रति आग्रह
समुदायले सरकार, नागरिक समाज र सञ्चारमाध्यमलाई कुनै पनि समुदायविरुद्ध भ्रम, पूर्वाग्रह र दुष्प्रचार फैलिन नदिन सक्रिय भूमिका खेल्न अनुरोध गरेको छ। साथै, समाजमा एकता र मेलमिलाप बढाउने प्रकारका संवादलाई प्राथमिकता दिन पनि आग्रह गरिएको छ।
