सुनसरी, मंसिर ११ गते ।
जेन्जी आन्दोलनकै क्रममा भदौ २४ गते सुनसरीको इटहरीस्थित इलाका प्रहरी कार्यालयमा गरिएको तोडफोड, आगजनी, लुटपाट तथा सुरक्षामा खटिएका प्रहरीमाथि दुर्व्यवहार गरेको आरोपमा ५ जनालाई प्रहरीले पक्राउ गरेको छ। पक्राउ परेकामध्ये इटहरी उपमहानगरपालिका–३ का २९ वर्षीय विजय लिम्बु, इटहरी–५ का ४४ वर्षीय दिपेन्द्र कुमार कार्की, इटहरी–८ का २४ वर्षीय आभाष कार्की, इटहरी–४ का २४ वर्षीय सोनम कार्की तथा भोजपुर याङपाङ्ग घर भई इटहरी–४ मा बस्दै आएका ४७ वर्षीय मदन खत्री रहेका छन्।
सुनसरी जिल्ला प्रहरी कार्यालयका अनुसार घटनामा संलग्न रहेको पुष्टि गर्ने क्रममा फोटो, भिडियो, सिसिटिभी फुटेज तथा सामाजिक सञ्जालमा सार्वजनिक सामग्रीको आधारमा उनीहरूलाई पहिचान गरी पक्राउ गरिएको हो।
उनीहरूविरुद्ध ‘अपराधिक उपद्रव गर्न नहुने’ मुद्दामा सुनसरी जिल्ला अदालतबाट म्याद थप गरी अनुसन्धान अघि बढाइएको प्रहरीले जनाएको छ।
प्रहरी कार्यालय, सवारी साधनमा आगजनी, तोडफोड तथा प्रहरीको हातहतियार लुटपाट जस्ता गम्भीर घटनामा संलग्न अन्य व्यक्तिहरूको खोजतलास जारी रहेको प्रहरीले जनाएको छ। यस सम्बन्धमा घटनास्थल वा अन्यत्र खिचिएका फोटो तथा भिडियोहरूमार्फत प्राप्त सूचना प्रहरीलाई महत्वपूर्ण हुने भएकाले कोही–कसैसँग सम्बन्धित सामग्री भएमा नजिकको प्रहरी कार्यालयलाई जानकारी गराउन कोशी प्रदेश प्रहरीले आग्रह गरेको छ।
