काठमाडौँ । शान्त देखिने मूलपानी क्षेत्र गएराति अचानक तनावग्रस्त बन्यो। उपत्यकाभर लुटपाट मच्चाउँदै आएको गिरोहलाई नियन्त्रणमा लिने क्रममा प्रहरीले गोली चलाएपछि क्षेत्रभर खलबली मच्चिएको थियो।
जिल्ला प्रहरी परिसर काठमाडौँको टोलीले विशेष सूचनाका आधारमा लुटेरा समूहलाई घेराबन्दी गर्दै नियन्त्रणमा लिन खोज्दा स्थिति अप्रत्याशित बनेको प्रहरी स्रोत बताउँछ। सुरक्षाकर्मीमाथि आक्रमणको प्रयास भएपछि प्रहरीले आत्मरक्षाका लागि दुई राउन्ड गोली चलाउनुपरेको थियो।
गोली लागेर गिरोहका एक जना मुख्य नाइके घाइते भएका छन्। उनलाई तत्काल उपचारका लागि ट्रमा सेन्टर लगिएको छ। घटनामा दुई जना प्रहरी पनि घाइते भएका छन्, जसको अवस्था खतरामुक्त रहेको बताइएको छ।
प्रहरीका अनुसार उक्त समूहले गौशाला, स्वयम्भू, बौद्ध र भक्तपुर क्षेत्रमा लगातार लुटपाट गर्दै सर्वसाधारणमा त्रास फैलाउँदै आएको थियो। सोही गिरोहका १० जनालाई प्रहरीले नियन्त्रणमा लिन सफल भएको छ। अनुसन्धान जारी रहेकाले पक्राउ परेकाहरूको नाम हाल सार्वजनिक गरिएको छैन।
प्रहरी प्रशासनले यो कारबाहीलाई उपत्यकामा बढ्दो अपराध नियन्त्रणतर्फको महत्वपूर्ण सफलता मानेको छ। सर्वसाधारणको सुरक्षाका लागि यस्ता कारबाही अझ कडा बनाइने संकेत पनि दिएको छ।
