जनकपुरधाम – धनुषामा शुक्रबार साँझ एक स्थानीय जनप्रतिनिधिको गोली प्रहार गरी हत्या भएको घटनापछि क्षेत्र तनावग्रस्त बनेको छ। मिथिलाविहारी नगरपालिका–९ का वडाध्यक्ष विन्देश्वर यादवलाई अज्ञात समूहले नजिकै आएर गोली प्रहार गरेको स्थानीयले बताएका छन्।
साँझ करिब ६ बजेतिर भएको उक्त हमलापछि गम्भीर घाइते भएका यादवलाई तत्काल उपचारका लागि प्रादेशिक अस्पताल जनकपुर पुर्याइएको थियो। तर चिकित्सकहरूले उनलाई बचाउन नसक्दा मृत्यु घोषणा गरेका हुन्।
स्वतन्त्र उम्मेदवारका रूपमा निर्वाचित वडाध्यक्ष यादव स्थानीय क्षेत्रमा सक्रिय राजनीतिक व्यक्तित्वका रूपमा परिचित थिए। घटनाको कारण अहिलेसम्म स्पष्ट भएको छैन। गोली चलाउने समूह भने घटना स्थलबाट फरार भएको र उनीहरूको खोजी तीव्र पारिएको धनुषा प्रहरीले जनाएको छ।
घटना पछाडि कुनै समूह वा व्यक्तिको संलग्नता रहे–नरहेकोबारे अनुसन्धान भइरहेको प्रहरीले बताएको छ। स्थानीयवासी भने यस्तो आपराधिक गतिविधिले नगरको सुरक्षा चुनौतीपूर्ण बन्दै गएको बताएका छन्।
