काठमाडौँ ।
बङ्गलादेश सरकारले पूर्व प्रधानमन्त्री शेख हसिना र पूर्व गृहमन्त्री असदुज्जमान खान कमललाई भारतले “तुरुन्तै” फिर्ता पठाउनुपर्ने माग पुनः कडाइका साथ अघि सारेको छ। यो माग अन्तर्राष्ट्रिय फौजदारी न्यायाधिकरणले दुवैलाई मानवता विरुद्धका अपराधमा मृत्युदण्डको सजाय सुनाएपछि आएको हो।
विदेश मन्त्रालयले सोमबार जारी गरेको विज्ञप्तिमा भारतले शरण दिनु मित्रराष्ट्रको अनुकूल व्यवहार नहुने चेतावनीसमेत दिएको छ।
विज्ञप्तिमा भनिएको छ, “दुवै दोषीलाई सुरक्षित बसोबास उपलब्ध गराउनु न्यायका सिद्धान्तप्रति गम्भीर उपेक्षा हो ।”
बङ्गलादेशले विगतमा पनि भारत सरकारलाई धेरैपटक पत्राचारद्वारा सुपुर्दगी माग गरिसकेको तर औपचारिक प्रतिक्रिया नपाएको उल्लेख गरिएको छ। दुवै देशबीच रहेको सुपुर्दगी सन्धिको प्रावधानअनुसार भारतले आवश्यक सहकार्य गर्नुपर्ने माग पुनः दोहोरिएको छ।
हाल हसिना र कमल भारतमै बसेको अनुमान गरिए पनि भारतीय पक्षले उनीहरूको अवस्थाबारे कुनै सार्वजनिक टिप्पणी गरेको छैन। बङ्गलादेशको ताजा कदमलाई कूटनीतिक वृत्तले दुई देशबीचको सम्बन्धमा नयाँ तनावको संकेतका रुपमा हेरेका छन्।
