विराटनगर, मंसिर २८ । विराटनगरबाट काठमान्डू लैजाने उद्देश्यले अवैध रूपमा विलबिजकभन्दा बढी लत्ताकपडा ओसारपसार भइरहेको सूचनाका आधारमा प्रहरीले छापा मार्दा दुईजनालाई पक्राउ गरेको छ।
मंगलबार बिहान करिब ७:३० बजे जिल्ला प्रहरी कार्यालय मोरङबाट खटिएको टोलीले विराटनगर महानगरपालिका–४ स्थित विमानस्थल कम्पाउण्ड क्षेत्रमा राखिएको सामान चेकजाँच गर्ने क्रममा शंकास्पद रूपमा छाडिएको स्कुटर भेटेपछि अनुसन्धान अघि बढाएको थियो।
प्रहरीका अनुसार सुनसरीको देवानगन्ज–७ निवासी मनिष यादवले चलाएको प्र.१–०४–००२ प ६५४० नं. को स्कुटरमार्फत लत्ताकपडा (साडी, कुर्ता–सुरुवाल) विमानस्थल परिसरभित्र ल्याइएको अवस्थामा भेटिएको थियो। त्यसपछि प्रहरीले यादवलाई खोजतलास गर्ने क्रममा विराटनगर–४ स्थित शारदा अग्रवालको घरमा उनलाई चालक सहित फेला पारेको हो।
उक्त घरमा खानतलासी गर्दा प्र.१–०२–००१ च १४५१ नं. को पिकअप गाडीमा लोड गरिएका लत्ताकपडाहरु समेत फेला परेको प्रहरीले जनाएको छ। बरामद गरिएको कपडाको मूल्य करिब रु. १,७९,९०० रहेको छ।
घटनामा संलग्न विराटनगर–४ का तनवीर मुस्ताकिन सहित दुवै जनालाई पक्राउ गरी बरामद कपडा तथा सवारीसाधन सहित आवश्यक कारवाहीका लागि राजश्व अनुसन्धान कार्यालय, इटहरी बुझाइएको प्रहरीले जनाएको छ।
