विराटनगर – करिब ११ लाख रुपैयाँ बराबरको सामग्री बोकेको एक भारतीय ट्याक्टर भन्सार प्रक्रियामा अनियमितता भएको आशंकामा प्रहरीले नियन्त्रणमा लिएर राजस्व अनुसन्धान कार्यालय, इटहरीमा बुझाएको छ।
विराटनगर भन्सार कार्यालयबाट जाँचपास भइसकेपछि बाहिरिएको बीआर–३८–इ–७४२५ नम्बरको ट्याक्टरलाई विशेष सूचनाका आधारमा इलाका प्रहरी कार्यालय रानीबाट खटिएको टोलीले विराटनगर–१३, टेलिकम कार्यालय अगाडिबाट रोकेको थियो। प्रहरी निरीक्षक कविन राई नेतृत्वको टोलीले ट्याक्टरमा भन्सारमा घोषणा गरिएको मूल्यभन्दा धेरै सामान लोड गरिएको हुनसक्ने आशंकामा निगरानी गर्दै नियन्त्रणमा लिएको हो।
ट्याक्टरमा तुलसी गोल्ड पोलिस्टन थ्रेड, फिनिस लेदर, लेदर केमिकल, कटोक फेब्रिक्स लगायत विभिन्न सामग्रीहरू फेला परेका छन्। भन्सारमा यी सामानहरूको मूल्य रु १० लाख ९६ हजार ३७१ मात्र घोषणा गरिएको थियो।
प्रहरीले ट्याक्टर चालक भारत बिहार, अररिया जोगबनीका ३८ वर्षीय रोशन यादव लाई समेत नियन्त्रणमा लिएको छ। घटनामा भन्सार एजेन्टका सहकर्मी अकबर अलीको पनि संलग्नता रहेको शंका गरिएको छ। तर अलीले आफू निर्दोष रहेको दाबी गरेका छन्।
यता, राजस्व अनुसन्धान कार्यालय इटहरीका सूचना अधिकारी विदुर गौतमले ट्याक्टर र सामग्रीहरू खोलेर जाँच गर्ने प्रक्रिया सुरु भएको जानकारी दिए। उनले भने, “सम्पूर्ण सामग्री खोलिसकेपछि मात्र भन्सार छली भएको–नभएको निष्कर्ष निकालिनेछ।”
