विराटनगर, मंसिर ९ ।
निर्वाचन आयोगले हालै सम्पन्न गरेको मतदाता नामावली सङ्कलन अभियानले कोशी प्रदेशमा उल्लेखनीय वृद्धि देखिएको छ। असोज १० देखि मंसिर ५ सम्मको अवधिमा प्रदेशभर १ लाख ५७ हजार ६१३ नयाँ मतदाता दर्ता भएका प्रदेश निर्वाचन कार्यालयले जनाएको छ।
दर्ता भएका मध्ये ५८ हजार ९२५ जनाले जिल्ला/स्थानीय निर्वाचन कार्यालयमा उपस्थित भएर फोटो खिचाइ नामावलीमा समावेश गराएका हुन्। बाँकी ९८ हजार ६८८ जनाको विवरण भने राष्ट्रिय परिचयपत्र प्रणालीबाट स्वतः नामावलीमा समेटिएको कार्यालयले स्पष्ट पारेको छ।
यसअघि कोशी प्रदेशमा ३४ लाख ३३ हजार ९ सय मतदाता रहेका थिए। नयाँ दर्तासँगै प्रदेशको मतदाता सङ्ख्या झनै बढ्ने देखिएको छ। प्रदेशका १४ जिल्लामध्ये मोरङमा सबैभन्दा बढी ४४ हजार ४०२ जना नयाँ मतदाता थपिएका छन्। झापामा ३५ हजार ३१९ र सुनसरीमा ३२ हजार ३८२ मतदाता दर्ता भएका छन्। पहाडी जिल्लाहरूमा पनि संतोषजनक दरले मतदाता वृद्धि भएको छ।
आगामी फागुन २१ गते तोकिएको प्रतिनिधिसभा सदस्य निर्वाचनका लागि आवश्यक तयारीस्वरूप आयोगले यो अभियान सञ्चालन गरेको हो। हाल सङ्कलित विवरणको प्रमाणीकरण, दोहोरो नाम हटाउने तथा त्रुटि परिमार्जन गर्ने कार्य जारी रहेको आयोगले जनाएको छ।
