विराटनगर, मंसिर १० गते।
नेपाल प्रहरी प्रधान कार्यालय, अपराध अनुसन्धान विभाग नक्सालका प्रहरी वरिष्ठ उपरीक्षक (एसएसपी) मुकुन्द मरासिनी नेतृत्वको टोलीले कोशी प्रदेश प्रहरी कार्यालय विराटनगरअन्तर्गतको अपराध अनुसन्धान शाखाको सोमबार निरीक्षण तथा अनुगमन गरेको छ।
अपराध नियन्त्रण तथा अनुसन्धानलाई प्रभावकारी बनाउने लक्ष्यसहित विभागले कार्यान्वयन गरिरहेको चौथो अपराध नियन्त्रण तथा अनुसन्धान कार्य योजना अनुसार “फौजदारी कसुर अनुसन्धान गर्ने प्रहरी कार्यालयहरूको अनुगमन तथा निरीक्षण मापदण्ड, २०८१” बमोजिम उक्त निरीक्षण भएको हो।
अनुगमनका क्रममा शाखामा रहेको अभिलेख व्यवस्थापन, पेन्डिङ मुद्दाको अवस्था, हिरासत व्यवस्थापन, अपराधका घटनाका अभिलेख, अपराध न्यूनीकरणका लागि सञ्चालन गरिएका सचेतनामूलक कार्यक्रमलगायतका विषयहरू सूक्ष्मरूपमा अध्ययन गरिएको थियो।
निरीक्षणपछि कार्यरत प्रहरी अधिकृत तथा कर्मचारीहरूलाई निर्देशन दिँदै एसएसपी मरासिनीले अनुसन्धान प्रक्रियालाई अझ प्रभावकारी, पारदर्शी र परिणाममुखी बनाएर कानून कार्यान्वयन र अपराध नियन्त्रणमा नेपाल प्रहरीको गरिमा उच्च राख्न निरन्तर जुट्नुपर्नेमा जोड दिनुभएको थियो।
निरीक्षण तथा निर्देशन कार्यक्रममा प्रहरी वरिष्ठ उपरीक्षक दीपक पोखरेलसहित कोशी प्रदेश प्रहरी कार्यालय तथा मातहतका इकाइका अधिकारी तथा प्रहरी कर्मचारीहरूको उपस्थिति थियो।
अनुगमन टोलीले यसअघि नेपाल प्रहरी प्रदेश कार्यालय धरान, तथा यसअन्तर्गतका जिल्ला प्रहरी कार्यालय मोरङ, सुनसरी, झापा, पाँचथर, ताप्लेजुङ, धनकुटा, साथै इलाका प्रहरी कार्यालय अनारमनी, धरान र रानीको पनि क्रमिक रूपमा निरीक्षण तथा अनुगमन गरेको जनाएको छ।
