विराटनगर, २०८२ मंसिर १४ गते ।
झापा र मोरङ जिल्लाका छुट्टाछुट्टै स्थानमा प्रहरीले गरेको बिरगह अभियानअन्तर्गत लागूऔषध ब्राउन सुगर सहित चार जना व्यक्तिलाई पक्राउ गरेको छ।
इलाका प्रहरी कार्यालय दमक, झापाबाट खटिएको टोलीले हिजो साँझ ५ बजे दमक नगरपालिका–५ बाट दुई जनालाई पक्राउ गरेको हो। पक्राउ पर्नेमा ३० वर्षीय देवराज खड्का र ३२ वर्षीया सुस्मिता राई रहेका छन्। उनीहरूको साथबाट ३ ग्राम ३१० मिलिग्राम ब्राउन सुगर बरामद गरिएको प्रहरीले जनाएको छ।
यस्तै, मोरङमा अस्थायी प्रहरी पोस्ट मटेरुवा बाट खटिएको टोलीले हिजो राति विराटनगर महानगरपालिका–१७ बाट २३ वर्षीय साबिर मियालाई ब्राउन सुगर १०० मिलिग्राम सहित पक्राउ गरेको छ। सोही क्रममा बेलबारी नगरपालिका–११ का ३२ वर्षीय निशान मगरलाई पनि ३२० मिलिग्राम ब्राउन सुगर सहित नियन्त्रणमा लिइएको प्रहरीको भनाइ छ।
पक्राउ परेका सबैजनामाथि सम्बन्धित प्रहरी कार्यालयहरूमा थप अनुसन्धान जारी रहेको प्रहरीले जानकारी दिएको छ।
