काठमाडौं । हङकङको ताई पो क्षेत्रमा रहेको एक विशाल अपार्टमेन्ट ब्लकमा भीषण आगलागी हुँदा मृत्यु हुनेको संख्या १४६ पुगेको छ। मृतकमध्ये एकजनाको पहिचान अग्नि नियन्त्रकका रूपमा गरिएको स्थानीय सञ्चार माध्यमहरूले जनाएका छन्।
बुधबार दिउँसो मर्मतसम्भारका लागि भवनको बाहिरी भागमा राखिएको बाँसको खटमा आगो सल्किँदा आगलागी सुरु भएको थियो। आठवटा भवनमध्ये सातवटामा आगो फैलिँदै भयावह रूप लिएको अधिकारीहरूको भनाइ छ।
घटनामा १२ अग्नि नियन्त्रकसहित ७९ जना घाइते भएका छन्। साथै १५० जनाको अवस्था अद्यापि अज्ञात रहेको प्रहरीले जनाएको छ। उनीहरूको खोजी कार्य ठूलो मात्रामा जारी छ।
अधिकारीका अनुसार मर्मतका क्रममा प्रयोग गरिएको नाइलन डोरी, बाँस र अन्य दहनशील सामग्रीका कारण आगो केही मिनेटमै भवनहरूमा फैलिएको थियो।
आगलागीपछि हङकङ सरकारले देशभर तीन दिनको शोक घोषणा गरेको छ। लगभग दुई हजार अपार्टमेन्ट रहेको सो आवासीय क्षेत्रमा करिब चार हजारभन्दा बढी मानिस बस्दै आएका थिए।
उद्धार, पहिचान र क्षति मूल्यांकनका कामहरू निरन्तर भइरहेको छ।
