काठमाडौं । जनता समाजवादी पार्टी (जसपा) नेपालका केन्द्रीय उपाध्यक्ष विद्युत बज्राचार्यले पार्टी परित्याग गर्दै नेपाल कम्युनिस्ट पार्टी (नेकपा)मा आबद्ध भएका छन्। बज्राचार्यसँगै विभिन्न तहका दर्जनौँ नेता–कार्यकर्ताले पनि नेकपाको सदस्यता लिएका छन्।
आज आयोजित कार्यक्रममा नेकपाका संयोजक पुष्पकमल दाहाल ‘प्रचण्ड’ र सहसंयोजक माधवकुमार नेपाललगायत शीर्ष नेतृत्वले नवप्रवेशीहरूलाई खादा र माला लगाएर स्वागत गरेका हुन्।
यस अवसरमा बज्राचार्यले विचार र लक्ष्य मिल्ने राजनीतिक शक्तिहरूबीचको एकताले मात्र देशलाई स्थिरता र अग्रगमनको दिशामा लैजान सक्ने धारणा राखे। उनले पछिल्लो समय नेकपाप्रति आमकार्यकर्ता र जनस्तरबाट आकर्षण बढ्दै गएको दाबीसमेत गरे।
राजनीतिक वृत्तमा बज्राचार्यको यो कदमलाई आगामी दिनमा दलगत समीकरणमा असर पार्ने महत्वपूर्ण घटनाका रूपमा हेरिएको छ।
