विराटनगर ।
मोरङको विराटनगरमा लागूऔषध कारोबारमा संलग्न दुई जनालाई प्रहरीले खैरो हेरोइन, नगद रकम र मोटरसाइकलसहित नियन्त्रणमा लिएको छ ।
मिति २०८२ साल माघ ६ गते करिब ११ बजेको समयमा, लागूऔषधको कारोबार भइरहेको भन्ने विशेष सूचनाका आधारमा जिल्ला प्रहरी कार्यालय मोरङ र लागूऔषध नियन्त्रण ब्युरो विराटनगरको संयुक्त प्रहरी टोलीले विराटनगर महानगरपालिका–४ स्थित नोबेल अस्पताल जाने बाटो नजिक सडक किनारमा शंकास्पद अवस्थामा रहेको को ३७ प ३३६६ नम्बरको मोटरसाइकल रोकेर जाँच गरेको थियो ।
जाँचका क्रममा मोटरसाइकल चालक सुनसरीको झोक्राहा–नरसिंह गाउँपालिका–५ स्थायी घर भई हाल विराटनगरमा रहेका ३५ वर्षीय सुदिन अन्सारीको साथबाट १४० ग्राम खैरो हेरोइनजस्तो देखिने पदार्थ फेला परेको प्रहरीले जनाएको छ ।
प्रारम्भिक सोधपुछका क्रममा अन्सारीले उक्त लागूऔषध सुनसरीको इटहरी उपमहानगरपालिका–५ का ५० वर्षीय रोहित काकीले बोक्न दिएको बयान दिएपछि प्रहरीले तत्काल काकीलाई समेत नियन्त्रणमा लिएको थियो । काकीको साथबाट नेपाली नगद ७५ हजार रुपैयाँ बरामद गरिएको छ ।
दुवै जनाको बयानका आधारमा प्रहरी टोलीले इटहरीस्थित रोहित काकीको घरमा खानतलासी गर्दा थप लागूऔषध र प्रतिबन्धित औषधि फेला परेको छ । घरको कोठाबाट १४.२३ ग्राम खैरो हेरोइनजस्तो पदार्थ,
प्रतिबन्धित औषधि “डिक्लोफेनाक” लेखिएको १८ बोतल,
“ट्रामाडोल” लेखिएको ४६ पत्ता (४६० ट्याब्लेट) र
“केप्सुल” लेखिएको ४२ पत्ता (३३६ क्याप्सुल) बरामद गरिएको प्रहरीले जानकारी दिएको छ ।
बरामद लागूऔषध, नगद रकम र मोटरसाइकलसहित दुवै जनालाई नियन्त्रणमा लिई जिल्ला प्रहरी कार्यालय मोरङमा ल्याएर आवश्यक थप अनुसन्धान भइरहेको प्रहरीले जनाएको छ ।
