विराटनगर, माघ 7 गते ।
कोशी प्रदेश प्रहरी कार्यालय विराटनगरले उत्कृष्ट कार्यसम्पादनको मूल्याङ्कन गर्दै प्रहरी निरीक्षक प्रकाश थापालाई २०८२ साल पुस महिनाको ‘सर्वोत्कृष्ट प्रहरी’ घोषित गरेको छ ।
विभागीय मूल्य–मान्यता, आदेश–निर्देशनको पालना गर्दै उच्च मनोबल, साहस र जिम्मेवारीका साथ कर्तव्य निर्वाह गरेबापत निरीक्षक थापालाई उक्त सम्मान प्रदान गरिएको कोशी प्रदेश प्रहरी कार्यालयले जनाएको छ ।
प्रहरी निरीक्षक थापाले २०८२ साल असोज २६ गते ओखलढुंगा जिल्लाको सिद्धिचरण नगरपालिका–४ चार्खुमा ५२ वर्षीया **रत्नकुमारी कटवाल (कार्की)**को हतियारधारी समूहद्वारा बन्चरो प्रहार गरी गरिएको बीभत्स हत्या तथा नगद र सुनका गरगहना लुटपाटको घटनामा सफल अनुसन्धान गरी अपराधी पहिचान गर्न महत्वपूर्ण भूमिका निर्वाह गरेका थिए ।
यसैगरी, २०८२ साल पुस १५ गते ओखलढुंगाकै चिशंखुगढी गाउँपालिका–६मा किराना पसल सञ्चालक दम्पति ६० वर्षीय सोवितमान थापा मगर र ६० वर्षीया रत्नमाया थापा मगरको कोदालो तथा अन्य हतियार प्रयोग गरी गरिएको हत्या तथा करिब १ लाख रुपैयाँ नगद र ८ तोला सुन लुटपाटको घटनामा संलग्न ४ जना अभियुक्तलाई पक्राउ गरी कानूनी कारबाहीको दायरामा ल्याउन उनले उल्लेखनीय योगदान दिएका थिए ।
