विराटनगर, असोज ४ गते ।
कोशी प्रदेशका झापा, मोरङ, सुनसरी र इलाममा लागूऔषध कारोबार तथा ओसारपसारविरुद्ध प्रहरीले चलाएको अभियानका क्रममा एकैदिन १४ जना पक्राउ परेका छन् । प्रहरीले उनीहरूको साथबाट ब्राउन सुगरदेखि ठूलो परिमाणमा गाँजासम्म बरामद गरेको जनाएको छ ।
प्रहरीका अनुसार असोज ३ गते मात्रै चार जिल्लाका विभिन्न स्थानबाट पक्राउ परेकामध्ये केही व्यक्तिको साथबाट ब्राउन सुगर बरामद भएको छ भने सुनसरीमा पिकअपमा लुकाएर लैजाँदै गरिएको १ हजार ४ सय ५४ किलो ८ सय ७० ग्राम गाँजा बरामद भएको छ ।
सुनसरीको इनरुवा नगरपालिका–१० मा जिल्ला प्रहरी कार्यालय सुनसरीको टोलीले को १ च ८२७९ नम्बरको टाटा पिकअप जाँच गर्ने क्रममा ठूलो परिमाणमा गाँजा फेला पारेको हो । प्रहरीले पिकअप चालक भोक्राहानरसिंह–५ का ३० वर्षीय रामबहादुर यादवलाई पक्राउ गरेको छ ।
यता झापामा मात्रै विभिन्न घटनामा सात जना पक्राउ परेका छन् । मेचीनगर–७ बाट नारायण किसानलाई १० ग्राम ९ सय मिलिग्राम ब्राउन सुगरसहित पक्राउ गरिएको प्रहरीले जनाएको छ । सोही स्थानबाट संजित राजवंशी र प्रवीण उराउलाई १ सय ३० मिलिग्राम ब्राउन सुगरसहित नियन्त्रणमा लिइएको छ ।
दमक नगरपालिका–१ बाट किरण साम्बा लिम्बु र रोशन राईलाई १ ग्राम ७ सय ३० मिलिग्राम ब्राउन सुगरसहित पक्राउ गरिएको छ ।
मोरङमा पनि लागूऔषधसहित चार जना पक्राउ परेका छन् । पथरीशनिश्चरे–१ बाट करण राईलाई १ ग्राम १ सय १० मिलिग्राम ब्राउन सुगरसहित पक्राउ गरिएको छ । सोही क्षेत्रमा सुक्रबहादुर तामाङ र सन्दिप राईको साथबाट ३१ ग्राम १ सय १० मिलिग्राम गाँजा बरामद भएको प्रहरीले जनाएको छ ।
प्रहरी चौकी सिक्टीले कानेपोखरी–६ का विक्रम गुरुङ र केविना गुरुङलाई ५ ग्राम ७० मिलिग्राम ब्राउन सुगरसहित पक्राउ गरेको छ ।
सुनसरीको महेन्द्रनगरबाट भारतको बिहारका २० वर्षीय विपिन कुमार यादवलाई ८ सय ३० मिलिग्राम ब्राउन सुगरसहित पक्राउ गरिएको छ ।
इलाममा पनि लागूऔषधसहित दुई जना पक्राउ परेका छन् । इलाम नगरपालिका–९ बाट ३४ वर्षीय मौसम लिम्बु र ३४ वर्षीया मनिषा लिम्बुलाई ५ सय ४० मिलिग्राम ब्राउन सुगरसहित नियन्त्रणमा लिइएको प्रहरीले जनाएको छ ।
चार जिल्लाका घटनालाई हेर्दा ब्राउन सुगरको सानो परिमाणसहित पक्राउ पर्ने व्यक्तिदेखि सवारीसाधनमा ठूलो परिमाणमा गाँजा ओसारपसार गर्ने प्रयाससम्मका घटना देखिएका छन् । प्रहरीले पक्राउ परेका सबैमाथि थप अनुसन्धान भइरहेको जनाएको छ ।
