भारतमा विषाक्त कफ सिरप काण्ड : बालबालिकाको मृत्युपछि निर्माता पक्राउ
एजेन्सी । नयाँ दिल्ली ।
भारतमा फेरि एकपटक विषाक्त औषधि काण्डले जनस्वास्थ्य प्रणालीमाथि ठुलो प्रश्न उठाएको छ। तमिलनाडुको स्रसेन फार्मा कम्पनीद्वारा उत्पादन गरिएको ‘कोल्ड्रिफ’ नामक कफ सिरप सेवनका कारण मध्य प्रदेशमा कम्तीमा २० बालबालिकाको ज्यान गएको पुष्टि भएपछि कम्पनीका मालिक एस. रंगनाथन पक्राउ परेका छन्।
प्रहरीका अनुसार, सिरपमा हानिकारक रासायनिक मिसावट भएको फरेन्सिक परीक्षणले पुष्टि गरेको छ। यसै कारण उक्त सिरप सेवन गर्ने धेरै बालबालिकामा गम्भीर स्वास्थ्य जटिलता देखिएको थियो।
मध्य प्रदेशको छिन्दवाडा प्रहरीले रंगनाथनलाई चेन्नईबाट पक्राउ गरी अदालतमा पेस गरेको जनाएको छ। उनलाई ट्रान्जिट रिमान्ड लिएर छिन्दवाडा ल्याइने तयारी भइरहेको छ।
प्रहरी र स्वास्थ्य विभागले स्रसेन फार्माको कार्यालयमा छापा मारेर धेरै कागजात र नमूना सिरपहरू जफत गरेका छन्। प्रारम्भिक अनुसन्धान अनुसार कम्पनीले गुणस्तर मापदण्डको उल्लंघन गर्दै बजारमा सिरप वितरण गरेको पाइयो।
स्वास्थ्य अधिकारीहरूले देशभर ‘कोल्ड्रिफ’ सिरपको वितरण, बिक्री र प्रयोग तत्काल रोक्न निर्देशन दिएका छन्। साथै, उक्त सिरप सेवन गरेका बालबालिकामा असामान्य लक्षण देखिए तुरुन्त चिकित्सकसँग सम्पर्क गर्न आग्रह गरिएको छ।
यस घटनापछि भारतको औषधि नियामक प्रणाली र गुणस्तर परीक्षण प्रक्रियाको कठोर समीक्षा र सुधारको माग व्यापक रूपमा उठ्न थालेको छ।
